إشاعه كثره الريفريش بشكل مستمر تساعد علي تسريع الجهاز

الإشاعة :- اعمل ريفرش بشكل مستمر على الديسكتوب لتسريع/تنشيط الجهاز

الحالة :- خاطئة !

التوضيح :-

ملهاش اي علاقة على الإطلاق
او زي ما بيقولوا Placebo Effect
وانا شخصيا لما بشوف حد بيعمل كدة بيجيلي شلل
مين قال انها بتسرع او بتعمل اي كلام من ده ؟
زي ما متصفح الانترنت فيه امر ريفريش عشان تعيد تحميل الصفحة
برضو متصفح الملفات بتاع الويندوز نفس الفكرة فيه خاصية ريفريش بنفس الفكرة وهي اعادة قراية الملفات في الفولدر او المكان اللي عملت فيه ريفرش بنفس فكرة متصفح الانترنت وهي اعادة تحميل محتويات الصفحة مرة تانية
انت لو شفت واحد فتح صفحة وكل شوية يعملها ريفرش بدون سبب ..حتقول عليه ايه ؟
نفس الكلمة المفروض تقولها للي بيقعد يعمل ريفرش ع الديسكتوب بدون سبب

طيب حيجي هنا سؤال:
– ايه فايدة خاصية الريفرش ديه اصلا طالما اللي بيستخدمها مش عاجبك
ببساطة في اصدارات الويندوز القديمة كان لما تنقل ملف او تغير اي حاجة فيه التغيرات ديه مبتظهرش مباشرة
لازم تعمل ريفرش عشان متصفح الملفات يعيد قرايتها من جديد ويظهر التغيرات اللي حصلت
بس ده كان زمان تقريبا في ويندوز 95 واللي قبله
لكن مع تطور الويندوز متصفح الملفات تلقائيا بيعمل ريفرش وبيظهر اي تحديثات او تعديلات ظهرت على الملفات اللي ظاهرة قدامك في النافذة اللي عملت فيها الريفرش

– طيب ليه مايكروسوفت سايبها طالما ان متصفح الملفات بيعمل ريفرش لوحده ؟!
ببساطة نفس فكرة متصفح الانترنت
احينا بتحمل الصفحة وبعدين تلاقيها متحملتش بشكل كامل او فيه حاجة ناقصة او ..الخ لاي سبب ما
فبتروح عامل ريفرش وغالبا الصفحة بتظهر بشكل سليم

نفس الموضوع في متصفح الملفات احيانا ولسبب ما مشكلة في الويندوز مثلا او الخاصية تم تعطيلها من الرجستري او لتاكد 100% ان كل الملفات تمام وان الملفات اللي ظاهرة صحيحة ..وفي الحالة ديه يكفتى بريفرش واحد مش 500 ريفرش في الثانية
+ من وجهة نظر تانية ..انت كدة بتحمل البروسيسور والهارد اوامر اضافية غير اللي هما اصلا قاعدين ينفذوها
يعني (لو) حيكون للامر ده تاثير ع السرعة فالمفروض يكون سلبي مش ايجابي

By : Mohmed Shalby